MIDEUEN ACEH.EU.ORG , JEUNIEB - Watee Mak si Hamid geujak u rumoh Tgk. Rayek, geujak lakee si Aseunah utk jeut keupurumoh si Hamid. Geukheun le Mak si Hamid bak Tgk. Rayek:
"Meunoe Tgk. Rayek, troh langkah lon keunoe bak Tgk. Rayek, lon jak lakee sibak bongong keu-aneuk long di Hamid, nyang galak jih that-that keu bungong nyang na bak Tgk. Rayek," kheun Mak si Hamid bak Tgk. Rayek.
Suot Tgk. Rayek: "hai meubungong pakon teuma, nyan pat di leuen dum, neupot laju keudroe neuh. Nyang bek neupot bungong ata sidara pula, takot karu jih euntreuk. Nyang laen neupot laju pue bungong nyang galak si Hamid", kheun Tgk. Rayek.
Jaweub Mak si Hamid: "Kon bungong nyan hai Tgk. Rayek. Aneuk long si Hamid galak jih that-that keu sinyak Aseunah aneuk Tgk. Rayek. Meusabab nyan troh ulon tuan keunoe, lon jak lakee sinyak Aseunah bak Tgk. Rayek beujeut keu judo aneuk lon tuan sinyak Hamid".
"Pue neupeugah, si Aseunah beujeut keujudo si Hamid. Alah hai cuma, pakon roh neujak meucikot si Aseunah beujeut keujudo si Hamid. Soe droe neuh soe long. Meunye si Aseunah long peukawen ngen si Hamid, nyan lagee ureueng peusapat uroe ngen malam hai cuma. Hana mungken, si Hamid ureueng geubeue kubeue long. Meunye long peukawen si Aseunah ngen si Hamid, ho long ba muka long ngen ureung Gampong cuma?", kheun Tgk Rayek bak Mak si Hamid.
Si Aseunah nyangka dari bunoe dideunge rot ruhueng binteh Mak si Hamid peugah haba ngen Tgk. Rayek, langsong diteubiet, itanyong bak Tgk. Rayek: "Pakon Abu, dari bunoe long deunge meusebot-seubot nan long ngen bang Hamid, nyang geubeue kubeue geutanyoe", tanyeng di Aseunah bak Abu jih Tgk. Rayek.
Suot Tgk. Rayek: "Nyoe Mak si Hamid geujak lakee kah keujudo si Hamid".
"Long geujak lakee le mawa nyoe keujodo bang Hamid? Hai mawa, neuwoe neupeugah bak bang Hamid, gop nyan neuyue lhoh droe geuh ilee bak kubang keubeue, bek geujak galak keulong", kheun si Aseunah bak Mak si Hamid.
"Nyan Kon ka neudeunge keudroe neuh langsung bak si Aseunah cuma", suot Tgk. Rayek.
Deungen punoh rasa hina beudoh Mak si Hamid geujak urumoh geuh. Si Hamid nyang ka dipreh dirumoh, ban troh woe Mak jih langsong ditanyong: "Kiban Mak, geutem Tgk Rayek si Aseunah jeut ke judo long?"
"Alah hai Aneuk, kaleuh keupeugah meunye ngen si Aseunah aneuk Tgk Rayek nyan bak kagalak, nyan legee geutanyoe cet beuleun ngen puteng sadeup. Tapi hana kadeunge ikah hai Hamid pue nyang Mak peugah", khen Mak si Hamid bak si Hamid.
"Pakon Mak?", tanyeng di Hamid bak Mak jih lom.
"Pue pakon, geutanyoe keunong hina abeh bak Tgk Rayek ngen bak aneuk si Aseunah. Sampe dikheun le si Aseunah keukah hai Hamid, kah diyue jak lhoh droe keuh dilee bak kubang keubeue, bak kajak galak keujih".
"O meunan ikheun le si Aseunah Mak nye? Hana pue Mak. Mak bek sedeh, si Aseunah nyan akan teutap lon mita cara beugalak jih keu long Mak. Meunye han trok kucet ngen reunong Buloh, kudong dijioh kupupo geulawa. Nyang si Aseunah nyan beudimeukawen ngen long", kheun si Hamid bak Mak jih.
Bek lale, kareuna nyan keuh, beudoh si Hamid meuijak tapa treuk keudeh u gunong Geureudong. Kira-kira na sibeuleun si Hamid lam itapa di gunong Geureudong, troh treuk sidroe ureung lam tapa jih geujok sikrek boloh (suleng), nyang nan buloh nyan buloh peurindu.
Atee geujok boloh nyan keu si Hamid, geuwasiet le ureueng jok nyan: "Nyoe boloh nyoe tapergunakan, meunyena ureueng nyang hina gata, tayup buloh nyoe atee teungeh malam, ureung nyang hina gata nyan akan diseumah dan dilakee meu'ah bak gata hai aneuk muda", kheun ureung nyang na lam guha gunong geureudong atee geujok boloh nyan keu si Hamid.
Leubeh kureung sibeuleun si Hamid di gunong geureudong. Beudoh si Hamid woe u Gampong. Bak dimalam meudimubuet treuk si Hamid diyub buloh peurindu bak manyu rumoh teungeh malam lam beuleun pengeuh.
Seura diyup boloh peurindu nyan, dikheun le si Hamid: "Jinoe kuyup kah buloh meutuah, boloh nyang ceudah boloh pusaka.
Sinoe kuteu-oh sideh beuteurhok, sinoe kuteupok si deh beujaga.
'Oh di eh malam ate teugoe-goe, meunye di deunge boloh pusaka.
Ie dijep beurasa duroe, bu dipajoh beubagoe suda. Eee pari rimba, roh jih tujoh kacok ban tujoh, jih kaparoh keunoe kaba. Meunye teungeut jih kapugoe, meunye jaga keunoe kamaba.
Rinduuuu...rinduu, rinduuu si Aseunah kepadaku".
Begitu si Hamid abeh dibaca mantra nyan, dan abeh diyup boloh peurindu. Krie jimoe si Aseunah lam teungeh malam di rumoh jih, seura jimeuhoi: "bang Hamid, bang Hamid, neujak cok long neuba sajan droe neuh".
Nyan ban cara bang Hamid geutaklok ate si Aseunah, aneuk Tgk. Rayek bangsawan Gampong nyang sombong. Semua itu dikisahkan dlm cerita "Buloh Peurindu" oleh Sandiwara Sinar Jeumpa, di tahun-tahun 1970 (***)
Post a Comment